Máis de mil estudantes visitaron connosco a AGASP

Máis de mil nenas e nenos da Estrada acudiron hoxe, 15 de xuño, á presentación do libro Os Bolechas van á Academia Galega de Seguridade. Alí coñeceron Os Bolechas pero tamén aos profesionais que se encargan diariamente da nosa seguridade.


15 de xuño de 2015



Os escolares da Estrada visitaron esta mañá a Academia Galega de Seguridade Pública para coñecer as instalacións e o seu funcionamento así como as profesións das persoas que se forman nesta gran escola. Con eles estiveron tamén Os Bolechas, co seu R4 e o espectacular autobús de dous pisos que puideron coñecer de preto os máis de mil nenos e nenas que participaron neste acto.

Ao remate, tras coñecer o que se fai na Academia e cal é o labor de cada un dos profesionais que se forman nela –policías, garda civís, bombeiros, persoal de Emerxencias, Protección Civil etc.–, os cativos recibiron o libro dos Bolechas sobre a Academia e un título que os acredita como "policías infantís".  

Os Bolechas van á Academia Galega de Seguridade Pública

O novo conto da colección “Guías Bolechas” narra unha visita da escola dos Bolechas ao centro. Ao tempo que Os Bolechas e as súas compañeiras e compañeiros percorren as instalacións e coñecen o funcionamento da Academia e das distintas seccións, os lectores do libro irán descubrindo o que se fai neste importante centro de aprendizaxe e as funcións que corresponden a cada membro de emerxencias e das forzas de seguridade no seu labor diario.

Unha boa forma de achegar aos máis novos o traballo destes profesionais que desenvolven un labor esencial na nosa sociedade. 









Arquivos