Presentamos… Xeitos de falarmos galego!

Esta mañá presentamos na cidade de Pontevedra a exposición “Gatiños, Ghatiñas, Gatíos. Xeitos de falarmos galego” que percorrerá toda a provincia explicando, da forma máis divertida, as variedades dialectais da nosa lingua. Unha iniciativa da Deputación de Pontevedra no marco da programación do Ano da Lingua.


18 de maio de 2018



A mostra inaugurada esta mañá polo alcalde de Pontevedra, Miguel Anxo Fernández Lores, o deputado de Cultura e Lingua da Deputación de Pontevedra, Xosé Leal e o editor Antonio Couto, estará na praza de Montero Ríos ata o vindeiro 29 de maio. Despois viaxará por todas as comarcas da provincia cunha mensaxe pedagóxica e de contacto coa nosa lingua da man dos Bolechas, “referente galego falante de varias xeracións de galegos”, como recordou Antonio Couto na presentación, pero tamén “transmisores de valores como a amizade, o coidado do medio ambiente, a vida sa, a solidariedade ou a integración”.

Temas todos que teñen cabida nesta mostra sobre a riqueza do idioma e a necesidade de mantelo vivo e fomentar o seu uso desde idades temperás. Así o destacou Xosé Leal ao recordar que “son os nosos pais, nais, avós e avoas as que preservaron realmente o idioma e as que conseguiron que se manteña vivo ata hoxe en día con todas as súas especificidades”.

O deputado de Cultura e Lingua animou a cativada da provincia a achegarse a esta mostra e familiarizarse co galego que se fala nas diferentes partes do país, mentres que o alcalde de Pontevedra recordou a sentenza de Castelao de que “para idioma universal xa está o que falan os animais, as persoas temos a lingua que nos é propia, que é a nosa bagaxe cultural característica do lugar no que vivimos”. Miguel Anxo Fernández Lores advertiu da necesidade de “defender a nosa lingua, e unha forma de defendela é xogando e falándoa con total normalidade”.

A exposición

Centrada na lingua, a mostra propón un percorrido participativo pola riqueza do idioma galego ao longo e ancho do país, con actividades e xogos que introducen a rapazada no universo Bolechas. Ademais de participativa e didáctica, tamén é inclusiva e multisensorial atendendo ás necesidades de todo tipo de persoas, incluso as que teñan algún tipo de dificultade ou discapacidade. Dividida en varias áreas con diferentes enfoques, actividades e propostas, o obxectivo común é fomentar a aprendizaxe e uso do idioma a través do xogo e a experimentación.

Horario e visitas

A carpa estará aberta ao público en horario de 10:00 a 13:30 h e de 16:00 a 20:00 h, de luns a venres. Os sábados, domingos e festivos o horario é de 11:00 a 14:00 h e de 17:00 a 21:00 horas. Ademais de aberta ás familias e a todos os interesados, os centros educativos que desexen concertar visitas específicas poden facelo dirixíndose ao enderezo electrónico osbolechas@osbolechas.com ou no teléfono 981 569 155.

Lugares e datas

  • Pontevedra: 18 maio-29 maio. Avenida Montero Ríos           
  • Lalín: 1 xuño-11 xuño. Praza do ConcelloO
  • Vilagarcía de Arousa: 15 xuño-26 xuño. Praza do Auditorio
  • Moaña: 10 setembro-20 setembro. Alameda
  • A Estrada: 24 setembro-4 outubro
  • A Cañiza: 8 outubro-18 outubro. Praza Maior
  • Caldas de Reis: 22 outubro-1 novembro. Praza do Camiño
  • Tomiño: 5 novembro-15 novembro
  • Ponteareas: 19 novembro-29 novembro
  • Vigo: decembro (por determinar)








Arquivos