Máis dun centenar de estudantes dos colexios de Fontiñas e Monte dos Postes de Santiago de Compostela acompañaron hoxe os Bolechas na presentación da campaña “Xoguetes para a igualdade” que correu a cargo da secretaria xeral de Igualdade, Susana López Abella, e da directora xeral de Comercio e Consumo, Sol Vázquez. Baixo o lema “Xogamos iguais. Os xoguetes non teñen sexo”, a iniciativa permitirá distribuír 150.000 carteis e 100.000 marcapáxinas cun decálogo de consellos, tanto en centros comerciais e comercios como en centros de ensino, centros de saúde e concellos.

A finalidade da campaña é sensibilizar sobre o contido sexista e violento de moitos xogos e xoguetes, e loitar así contra os estereotipos de xénero que aínda persisten entre as xeracións máis novas. A secretaria xeral da Igualdade asegurou que é importante concienciar a nenos e nenas de que poden xogar indistintamente co mesmo xoguete, de xeito que se fomenten desde as idades máis temperás unhas relacións de igualdade e cooperación.

A directora xeral de Comercio e Consumo tamén incidiu na importancia de promover a igualdade desde a elección dos xogos e xoguetes, que inflúen de forma decisiva na aprendizaxe. E recomendou, de cara as vindeiras compras de Nadal, realizar un consumo responsable que teña en conta a seguridade, a creatividade e os valores implícitos dos xoguete, rexeitando os que sexan sexistas ou inciten á violencia e apostando por agasallos que non sempre impliquen algo material.

Decálogo de consellos

O decálogo que se inclúe nos carteis e marcapáxinas inclúe unha serie de consellos de utilidade á hora de escoller un xoguete para a igualdade. Así, entre outros aspectos, destacase a necesidade de non facer diferenzas á hora de escollelos, nin pensar que hai cores máis axeitados para un ou outro sexo.

Ademais, tamén se fai fincapé en que é positivo decantarse por produtos que fomenten relacións colaboradoras e favorezan a imaxinación, libre de prexuízos sexistas. Do mesmo xeito, recomenda optar por xoguetes, xogos ou libros nos que se nomee e estean presentes tanto nenas como nenos.