Que criterios seguiches para a selección de grupos?

Primeiro quería conseguir un disco coral, no que estiveran representados moitos dos xéneros musicais que se están desenvolvendo neste momento en Galicia. Dende o pop ao rap, pasando polo ska, a electrónica ou a música tradicional. 

Era o primeiro traballo destas características?

Non, anteriormente fixen un traballo similar para o caderno de vacacións Bababum, aínda que neste caso orientado un pouco máis ás tendencias actuais da música.

Que foi o máis complicado?

Tiven a sorte de que a editora, Bolanda, como as bandas colaboraron activamente no proceso, primeiro aceptando o proxecto e despois cumprindo os prazos etc., por tanto foi bastante doado nesta ocasión.

Como grupo que participou tamén no disco, como foi a selección do voso tema?

É unha canción de rock and roll para bailar, cunha temática universal que nos afectou a nós os tres persoalmente no pasado: os nenos non queren quitar nunca o chándal sexa na situación que sexa (un partido de baloncesto, unha voda, unha cea de Nadal ou unha clase de matemáticas), e estea o chándal no estado que estea (roto, manchado de nocilla...). É cómodo e é o uniforme dos rapaces e as rapazas. Estamos con eles!

É moi diferente traballar para nenos, adolescentes ou adultos?

Eu creo que a música é universal e transversal en canto a idades. Non me interesa o que chaman a música infantil como xénero, interésame que todo o mundo goce dela. Seguramente no proceso de composición hai que facer un pequeno esforzo para adaptar o discurso e conseguir que os nenos poidan comprender o que se está contando, pero creo que é un disco que tamén pode gozar plenamente un adulto e aí está o potencial desta recompilación. 

En que anda agora Novidades Carminha?

Acabamos de gravar un disco que presentaremos en marzo e o acompañaremos dunha xira pola península, polo momento, así que chegan momentos de máxima actividade para o grupo.