Como mola! é o título do tema que Álex Casanova compuxo para Os Bolechas fan unha banda. Pop electrónico, coidado e moi divertido, perfecto para abrir este primeiro disco dos Bolechas. Álex cóntanos como xurdiu esta colaboración.

Como recibiches a proposta de participar neste disco?

Comentoumo Carlos –o produtor do disco– e dixen que si ao momento. Xa colaborara con el noutros proxectos infantís e é algo que me gusta especialmente, porque combina a produción musical coa súa difusión, sobre todo coa parte máis educativa, que é xustamente o que eu estudei.

A túa canción fai referencia aos xogos tradicionais. Como xurdiu a idea?

Quería unha letra que fose interesante para os nenos e pensei enseguida no dos xogos tradicionais, eses aos que xogaban os nosos avós e os nosos pais e que a maioría dos nenos de hoxe non coñecen. Quero que, polo menos, saiban que hai outros xogos ademais das consolas e pregunten na casa por eles.

No que non tiveches dúbida foi na música, porque o teu estilo alegre e moi bailable adáptase perfectamente ao público Bolechas...

Si, eu fago pop electrónico e é verdade que funciona moi ben entre os máis novos. A miña música está nesa onda e vai ben para o tipo de disco, polo que non tiven que cambiar nin experimentar nada diferente ao que fago habitualmente.

Que é o que máis che gustou deste traballo?

O feito de poder combinar as miñas dúas paixóns: a música e a educación. Eu son músico pero son profesor de Educación musical, e este proxecto reúne moi ben ámbalas dúas disciplinas. Agardo que lles guste moito aos nenos.