Con motivo do Día Mundial do Doador de Sangue, institucionalizado pola Organización Mundial da Saúde (OMS) cada 14 de xuño, a Axencia de Sangue, Órganos e Tecidos, que coordina a doazón de sangue e órganos en Galicia, vai presentar unha guía destinada a explicar aos máis novos a importancia da doazón de sangue.

Aínda que a doazón de sangue só é posible a partires dos 18 anos, é fundamental concienciar desde a infancia da importancia deste acto solidario que salva vidas e que tamén sexa compartido polos rapaces cos seus pais en nais na casa. Por iso, desde o Centro de Transfusión de Galicia, integrado na nova Axencia, botaron man duns personaxes con gran implantación na infancia, capaces de facer chegar a mensaxe ás nenas e nenos galegos de forma divertida pero tamén didáctica, de xeito que entendan a importancia que ten un acto tan fácil como doar sangue.

De aí xurdiu o conto Papá Bolechas doa sangue que mañá será presentado no colexio Quiroga Palacios de Santiago pola directora da nova Axencia, Marisa López García. Durante o acto, que empezará ás 10:00 horas e contará coa presenza de varios Bolechas, os escolares poderán escoitar o conto grazas á colaboración do actor Emilio Guillín e recibirán cadanseu exemplar.