Este sábado, a partir das 12:00 h, Os Bolechas estarán na jaima “A doazón de sangue” que instalará a Axencia Galega de Sangue, Órganos e Tecidos no parque de Santa Margarita, na Coruña. (ADOS). Os irmáns Bolechas compartirán xogos e actividades coa cativada que se achegue ata o stand, no que se realizarán diversas accións, como un concurso de debuxo sobre a doazón de sangue para nenas e nenos de 7 a 9 anos e de 10 a 12. Ademais de repartirse tres premios por categoría, todos os participantes recibirán de regalo o conto Papá Bolechas doa sangue.

Outra das propostas da Axencia é un taller sobre doazón de sangue destinado a cativos de ata 6 anos. E para todos os asistentes porase en marcha un obradoiro de fabricación de chapas solidarias.

O Centro de Transfusión de Galicia subministra sangue as 24 horas do día a todos os hospitais de Galicia para desenvolver a actividade asistencial programada e facer fronte ás urxencias. Cada día 10 unidades móbiles percorren os concellos galegos para atender as persoas que desexan doar. Os hospitais precisan entre 400 e 500 doazóns de sangue cada día para que moitas persoas recuperen a saúde, de aí a importancia de concienciar a toda a sociedade da necesidade de realizar este acto altruísta.