Os Bolechas van a Valdoviño é o título da nova aventura que este domingo presentamos na Casa da Cultura deste concello da provincia da Coruña. A cita será ás 18:00 h e a entrada será libre e gratuíta; o Concello fai un especial chamamento ás nenas e nenos de Valdoviño que, de seguro, gozarán coas aventuras dos famosos personaxes de Pepe Carreiro no municipio.

A nova aventura da familia Bolechas comeza na capela de San Bartolo, en Sequeiro, onde os irmáns gozan dunha merenda con amigos de Valdoviño e tamén outros de fóra que, coma eles, están a pasar alí as vacacións. Carlos empeza a contar aventuras un pouco fantasiosas e os demais anímanse e narran tamén historias que lles aconteceron en diversos lugares do municipio, como na praia da Frouxeira, no encoro das Forcadas ou nas capelas do Porto, en Meirás, e da Fame en Vilarrube.

Sen dúbida, as vacacións en Valdoviño son ben divertidas!!