O novo autobús dos Bolechas causou unha auténtica revolución á súa chegada a Lobios (Ourense), a onde se desprazou todo o equipo dos Bolechas para facerlle entrega ao colexio do Xurés do premio gañado no concurso Debuxa o teu cole.

Os nenos do centro puideron subir ao espectacular autobús de dúas plantas, de estilo tipicamente londinense, e gozar das múltiples actividades que ofrece. No primeiro andar hai unha ludoteca con todo tipo de xogos e actividades para divertirse e aprender, ao máis puro estilo “Bolechas”, desde un “Quen é quen” con todos os personaxes das historias ou un peculiar “xogo da oca” ata todo tipo de material para manualidades, libros e ordenadores. Nos computadores os pequenos poden gozar tamén de múltiples actividades, como colorear, adiviñar o nome dos animais dunha granxa ou cantar cos Bolechas os seus superexitos.

No segundo andar o autobús conta cunha sala de cine dotada con todo o necesario para ver Os Bolechas en acción que serve tamén para presentacións e reunións de traballo. Neste espazo hai un encerado onde as nenas e nenos poden pintar e demostrar as súas habilidades artísticas. 

Aínda que o primeiro que chama a atención do autobús é o seu exterior, tanto polas dimensións do vehículo como pola espectacular decoración. Nun lado pódese ver Os Bolechas ataviados a xeito de banda galega e no outro con traxes típicos dos cinco continentes, posto que a familia galega está a chegar a todo o planeta a través dos seus milleiros de seguidores, que están a convertelos en personaxes universais, como universais son as súas historias e vivencias.

O novo autobús percorrerá a partir de agora toda a xeografía galega para levar diversión e coñecemento a todos os nenos e nenas que seguen con devoción Os Bolechas.