Con motivo do Día Internacional do Voluntariado que se conmemora cada 5 de decembro, a directora xeral de Xuventude, Participación e Voluntariado, Cecilia Vázquez, presentou e fixo entrega a escolares de educación infantil e primaria da guía Os Bolechas aprenden a ser persoas voluntarias, un libro que busca sensibilizar a poboación infantil sobre os valores solidarios e a xustiza social.

A guía dos Bolechas está pensada para o alumnado de 3 a 11 anos. O obxectivo é que os máis pequenos se comprometan e participen como axente xerador de cambios. Así mesmo, esta publicación ensínalles a detectar necesidades sociais e a identificar as causas que as provocan dun xeito ameno e divertido. Cada docente poderá axustar o seu contido aos tempos que crea convenientes, co fin de que os contidos teóricos da mesma se materialicen na realidade social, ao tempo que se dá a coñecer entre os máis cativos a realidade do voluntariado e a súa acción social na nosa comunidade a través dos distintos programas operativos que está a impulsar a Xunta de Galicia.

Voluntariado

O voluntariado é unha das formas de participación social máis relevante. É importante que a cativada se familiarice desde unha idade temperá coa acción social e cos beneficios que esta reporta a nivel individual e social. Os centros escolares, lugares de aprendizaxe formal pero tamén de transmisión de valores, constitúen un motor fundamental na súa evolución, de aí o esforzo da Dirección Xeral de Xuventude, Participación e Voluntariado por promover iniciativas neste eido e potenciar o papel dos escolares en actos coma este.