Promovido polo Concello do Pino para dar a coñecer as marabillas deste municipio, o novo libro dos Bolechas transcorre na ruta xacobea ao seu paso polo concello. Os Bolechas queren percorrer o Camiño de Santiago coa súa amiga Candela, que é do Pino. Mais a nena está no Concello e pídelles que vaian ata alí e, de paso, lle leven dous galos que ten na casa da súa avoa.

Son dous galos piñeiros moi testáns, e cada un quere ir por unha ruta, así que Os Bolechas divídense. Uns van polo Camiño do Norte con Cocorocó e outros polo Francés con Cacaracá. Pero aínda así os galos non andan. Os Bolechas teñen que tirar deles e pasar moitos traballos para chegar ata onda Candela.

Mentres, van coñecendo lugares ben fermosos, como as igrexas de San Xiao, Santa María de Gonzar e Santa María de Budiño, a fervenza do río Noa, a ponte romana de San Vicenzo do Pino, o camiño de Amenal ou as áreas recreativas de Vilar e Feira do Vinte, entre outros.